२४ जेठ,काठमाडौं । नेकपा एकीकृत समाजवादीका अध्यक्ष माधवकुमार नेपालले नेपाली राजनीतिमा आफ्नो पार्टीको भूमिका महत्त्वपूर्ण रहेको र यसबाट केही व्यक्तिहरू आत्तिएको बताएका छन्। उनले पूर्वाग्रह राखेर आफूमाथि भ्रष्टाचारको मुद्दा लगाउने पहल भइरहेको आरोप लगाएका छन्।एकीकृत समाजवादी मधेस प्रदेश सम्पर्क कमिटिको प्रथम अधिवेशनमा बोल्दै अध्यक्ष नेपालले भने, ‘अहिले नेपालको राजनीतिमा हाम्रो पार्टीको भूमिका महत्त्वपूर्ण रहेको छ। हाम्रो पार्टीको महत्त्वपूर्ण भूमिका देखेर कतिपय व्यक्तिहरू आत्तिएका पनि छन्, आतंकित पनि भएका छन्। पूर्वाग्रह राखेर बसेका छन्, बद्लाको भावनाले उनीहरूलाई पोलिराखेको पनि छ।’

उनले आफूमाथि भ्रष्टाचारको मुद्दा लगाउने प्रयासलाई यसैको एउटा उदाहरणका रूपमा प्रस्तुत गर्दै थपे, ‘भ्रष्टाचारको केस जसमा निर्णायकको आधार चाहिन्छ। माधव नेपालले कसैसँग एक पैसा घुस लिएको भएँ, एकदाम जग्गा घुस लिएको भएँ, अनुचित काम गरेको भएँ, देश र जनतालाई नोक्सान हुने कुनै काम गरेको भएँ त्यसको सम्पूर्ण जिम्मेवारी म लिन तयार छु।’

अध्यक्ष नेपालले आफूले कहिल्यै घुस नलिएको र देश तथा जनतालाई घात हुने कुनै अनुचित काम नगरेको स्पष्ट पारे। उनले आफ्नो स्वार्थका लागि कुनै काम नभएकोले आत्तिनु नपर्नेमा जोड दिए।

‘मैले भन्ने गरेको छु नबिराउनु, नडराउनु,’ उनले भने, ‘आफ्नो स्वार्थको लागि कुनै काम भएको छैन भनेर आत्तिनुपर्ने छैन। गलत आरोपमा दृढतासाथ उभिन्छौँ। मलाई विश्वास छ न्यायपालिकाले मलाई न्याय दिनेछ। हामीले न्यायालयलाई विश्वास गर्नुपर्छ।’